གཟའ། སྤེན་པ་དབུལ་པོ་མ་ནིང་བྲན། །བྱིས་པའི་བླ་གཟའ་དམངས་རིགས་ཏེ། །དྲག་པོ་མདོག་ནག་སའི་ཁམས་ལ། །ཁང་པ་རྩིག་བཟུང་ཞལ་བསྲོ་བ། །ས་ཁ་ལམ་འཕྲང་རྫིང་ཡུར་འཆོས།། ཚེ་གཡང་འགུགས་དང་ནོར་ཕྱུགས་ལེན། །ནོར་སྒྲུབ་སྒྱེད་འཛུགས་རྐུན་ཇག་དམག །ཞིང་ལས་མེ་ཏོག་སྐྱེ་ཤིང་འཛུགས། །ལྕགས་དང་མདའ་མཚོན་ནག་པོའི་ལས། །སྲི་མནན་རྒྱལ་མཚན་བང་མཛོད་འཛིན། །ཡུལ་མཁར་མིང་འདོགས་བུད་མེད་བགྲོད། །ཁྱི་གསོ་ས་བོན་འདེབས་དང་རྩིས། །དབུལ་ཕོངས་བྲན་དང་བྱིས་པ་ཡི། །བསྒྲུབ་བྱའི་ལས་དང་དྲག་ལས་བཟང་། །ནག་ཕྱོགས་དར་དུས་ལྟོ་བགྲོད་མཚན། །དལ་འགྲོས་སྟོབས་ཆེ་ཁྱད་པར་དུ། །ཆུ་བུམ་ཁྱིམ་གནས་བསད་ལས་འགྲུབ། །རབ་བྱུང་རབ་གནས་ཁྲིམས་ལུགས་འཆའ། །འཆད་ཉན་སྨན་སྦྱོར་གོས་དྲ་གྱོན། །རྒྱན་འདོགས་ལྷ་གསོལ་རྒྱལ་ས་འཛིན། །ནོར་ཕྱུགས་ས་ཞིང་ཡུལ་མཁར་རྣམས། །ཕྱིར་གཏོང་སྐྲ་འཁྲུ་སྐྲ་སེན་འདྲེག །གསོན་དགེ་བག་མ་གཤིན་གྱི་ལས། །གཏར་སྲེག་ཕྲུ་སློག་ཟློག་པ་ཚོང་། །ལྷ་ཁང་རྟེན་བཞེངས་བྲན་བརྟེན་བསྡུམས། །རྟ་དྲེལ་སྒ་རྒྱག་སྦྲ་ཕྱར་འཚེམ། །རྒྱལ་པོར་ཕྱག་མཆོད་ཞལ་ཆེ་སྐྱས། །ཞི་དང་རྒྱས་པའི་ལས་རྣམས་ངན།། ཚེས། ཚེས་བརྒྱད་དཀྱིལ་འཁོར་སྒྲུབ་མཆོད་དང་། །རབ་གནས་རྒྱལ་བ་ལྷ་རྟེན་བཞེངས། །ཞལ་ལྕེ་དགྲར་རྒོལ་དགྲ༌བྲུབ་རྐུན། །མནའ་སྐྱེལ་སྲི་མནན་ཐབ་བཅའ་བཟང་། །སྐྲ་བཀྲུ་གོས་དྲ་བག་མ་ལེན། །རབ་བྱུང་གཏར་ཁ་འབྲུ་འདེབས་ཁྲུས། །ཕྱུགས་ཉོ་རྫིང་ཡུར་ཁྲོན་འདྲུ་ངན།། སྐར་མ། སྣྲུབས་ནི་དམེ་སྐར་ཆུ་ཡི་ཁམས། །འབྲས་བུ་ངན་པ་དམངས་པོའི་བླར། །དམག་དྲང་བསད་དྲག་གྲོང་ཁྱེར་གཞོམ། །རབ་གནས་ཚེ་གཡང་རྟེན་བཞེངས་ཚོང༌། །འཕོ་སྐྱས་ལྷ་གསོལ་ཞལ་གསོ་དང༌། །ཁྲུས་བྱ་མཁར་ལས་བང་བ་རྩིག །སྒོ་འཛུགས་སྟོན་མོ་གཏམ་གཏོང་བ། །ཐུགས་འགྱེད་མོ་རྩིས་ས་བོན་འདེབས། །ནོར་རྫས་ཚུར་ལེན་ཆུ་སྲུང་གཏོང༌། །བྲན་བརྟེན་གཤིན་དགེ་མདོས་གཏོར་མནན། །དབང་དྲག་མངོན་སྤྱོད་ལས་རྣམས་བཟང་། །ཕར་འཇལ་ལམ་ཞུགས་རྒྱལ་སར་འཇུག །དྲ་གྱོན་བག་མ་དུར་གདབ་པ། །སྡུད་ཁ་ཟ་འགོ་འཛུགས་མིང་འདོགས། །སྤྲ་ཕྱར་ཐབ་བཅའ་རྒྱལ་མཚན་འཛུགས། །ཆུ་རགས་ཁྱིམ་འཛིན་ཆེན་པོའི་ལས། །སྦྱིན་སྲེག་ཞི་རྒྱས་ལས་རྣམས་ངན།། འབྱུང་འཕྲོད། ས་ཆུ་འཕྲད་པ་ལང་ཚོ་སྦྱོར། །ལང་ཚོ་སྦྱོར་བས་ཤིན་ཏུ་སྐྱིད། །དགའ་སྟོན་བྱ་ཞིང་ཆེ་སར་འདོན། །གོས་གྱོན་རྒྱན་འདོགས་རོལ་རྩེད་བཟང་།། སྦྱོར་བ། ཚེ་ལྡན་ཚེ་རིང་དཔལ་ཐོབ་བོ། གནམ་སྒོ། དུར་གྱི་གནམ་སྒོར་དུར་བཏབ་ན། །དུར་སྲི་བཏུད་ཅིང་ཐ་མར་འཕུང་།། ཀླུ་ཐེབས། ཀླུ་ཐེབས་དུས་སུ་ཆར་དབབ་པ། །ཀླུ་ཆོག་ཀླུ་གཏོར་གཏོང་བ་དང་། །ཀླུ་ལ་མནན་གཏད་སྐྱེལ་སོགས་བཟང་། ། མེ་ལྷ། མེ་ལྷ་ས་སྟེང་གནས་པར་བརྟེན། །སྲེག་བླུགས་འབུལ་ན་སྒྲུབ་པ་པོར། །དངོས་གྲུབ་རྣམ་གཉིས་ཐོབ་པར་འགྱུར། །