གཟའ། ཉི་མ་ལྷའི་གཟའ་སྐྱེས་པ་དང༌། །རྒྱལ་པོའི་བླ་གཟའ་རྒྱལ་རིགས་ཏེ། །ཞི་བ་དམར་སྐྱ་མེ་ཡི་ཁམས། །ལྷ་གསོལ་སྐྱེས་པས་བསྒྲུབ་པའི་ལས། །ཁྱད་པར་རྒྱལ་པོར་བསྐོ་བ་དང་། །ཕོ་བྲང་འདེབས་སོགས་རྒྱལ་སྲིད་དང༌། །རྒྱལ་རིགས་ཀྱིས་སྒྲུབ་བྱ་བའི་ལས། །མི་ཆེན་མཇལ་དང་ཕྱག་འབུལ་པ། །མེའི་ལས་ཁྱད་པར་དབང་དྲག་ཧོ། །ཐབ་བཅའ་བུ་བཙས་རབ་ཏུ་བྱུང༌། །སྨན་སྦྱོར་ཁྲུས་དང་དྲི་ཡི་ལས། །དངོས་པོ་ཚུར་ལེན་རྟ་ཕྱུགས་འདུལ། །གསེར་ཤིང་རུས་པ་པགས་པའི་བཟོ། །འབྲོག་དགོན་ནགས་ཁྲོད་འགྲོ་བ་དང༌། །གསོན་སྟོན་ཡོ་ལངས་དགེ་ཤིས་སོགས། །གསོན་པོའི་བྱ་བ་སྒྲུབ་པ་བཟང༌། །ཁྱད་པར་ཉིན་མོ་ཟླ་བའི་སྨད། །བྱང་བགྲོད་དུས་དང་སེང་ཁྱིམ་སླེབས། །དར་བའི་དུས་སུ་སྟོབས་ཆེའོ། །ལྷ་ཁང་ཁང་གསར་རྨང་གཞི་འདིང༌། །ཕྱིར་གཏོང་ལམ་ཞུགས་མནའ་སྐྱེལ་དགག །ནད་འདྲི་བག་མ་གོས་དྲ་གྱོན། །མི་ཤི་གཤིན་ཆོས་ཤིད་རོ་འདོན། །སྐྲ་སེན་འདྲེག་དང་སྦྲ་ཕྱར་འཚེམ། །གཏར་སྲེག་སྲི་མནན་བསྡུམས་བྱེད་པ། །རྫིང་ཡུར་ས་ཁ་ཞིང་འདེབས་དང༌། །མེ་ཏོག་ཤིང་འཛུགས་རབ་གནས་སྐྱས། །ཁྱིམ་འཛིན་བང་མཛོད་རྩིག་རྣམས་ངན།། ཚེས། ཚེས་གཉིས་རབ་གནས་རྒྱལ་སར་འཇུག །ཐབ་བཅའ་འབྲུ་འདེབས་རྫིང་ཁྲོན་འདྲུ། །ཕྱུགས་ཉོས་སྟོང་འཕེལ་རྒྱས་ལས་བཟང་། །སྐྲ་འཁྲུ་ལམ་ཞུགས་དོན་གཉེར་བ། །ཆུ་རགས་རྒྱག་དང་སྦྱིན་སྲེག་ངན།། སྐར་མ། མེ་བཞི་གཤིན་སྐར་རླུང་གི་ཁམས། །མི་བརྟན་འགྱུར་བ་ལུག་གི་བླར། །རབ་བྱུང་དཀྱིལ་འཁོར་འབྲི་སྒྲུབ་དབང་། །རབ་གནས་འཆད་ཉན་སྡོམ་པ་འབོགས། །མཆོད་འབུལ་ལྷ་གཡང་རྒྱལ་སར་བསྐོ། །སྨན་སྦྱོར་དྲ་གྱོན་རྒྱན་འདོགས་པ། །མཁར་ལས་ཐབ་བཅའ་ཡུལ་ཁྱིམ་འཛིན། །གཉེན་སྦྱོར་དགའ་སྟོན་མདུན་གྲོས་བྱ། །ས་ཁ་ཞིང་ལས་ས་བོན་གདབ། །རྫིང་འདྲུ་ཕར་རྒོལ་དམག་ཇག་རྐུན། །ཕྱུག་འདུལ་ཕྱུགས་བསྲེལ་གླང་ཆེན་ཞོན། །རྟ་བོང་ཟེ་རྔོག་འདྲེག་སྒ་རྒྱག །གནག་ལུག་ཁྱུ་འཛུགས་ཤཱ་རགས་བསྡུམས། །རྫིང་འདྲུ་མནན་པ་སྐྲ་སེན་འདྲེག །ཡིག་སློབ་བཟོ་དང་སྦྲ་ཕྱར་འཚེམ། །མོ་རྩིས་ཞུ་ནོར་འབུལ་བ་སོགས། །རང་དོན་མྱུར་སྒྲུབ་དྲག་ལས་བཟང༌། །ཕྱུགས་མ་ནང་ལེན་ལུག་ཕྱིར་གཏོང༌། །བང་བ་ཁ་འབྱེད་རྫས་ཕྱིར་འཇལ། །སྦྲ་ཁྱིམ་འབུབས་དང་ལམ་དུ་འཇུག །ཤིད་རོ་འདོན་སྲེག་ཕྱུགས་གཉའ་སྲོ། །ལྷ་ཁང་རྟེན་བཞེངས་ལྟད་མོ་སྐྱས། །ཚོང་དང་མེ་ཏོག་ཤིང་འཛུགས་ངན།། འབྱུང་འཕྲོད། མེ་རླུང་འཕྲད་པ་སྟོབས་ལྡན་སྦྱོར། །སྟོབས་ལྡན་སྦྱོར་བས་བཀྲ་ཤིས་བྱེད། །རིམ་གྲོ་ལྷ་གསོལ་ཆོས་སྤྱོད་བྱ། །ཞི་རྒྱས་དབང་གི་ལས་རྣམས་འགྲུབ།། སྦྱོར་བ། དཀར་པོ་འགྲོ་འདུག་བྱེད་པ་བཟང་། གནམ་སྒོ། ཚོང་གི་གནམ་སྒོར་ཚོང་བྱས་ན། །ཚོང་ཉེས་གོད་ཁ་རྒྱུན་མི་ཆད།།  མེ་ལྷ། མེ་ལྷ་ས་སྟེང་གནས་པར་བརྟེན། །སྲེག་བླུགས་འབུལ་ན་སྒྲུབ་པ་པོར། །དངོས་གྲུབ་རྣམ་གཉིས་ཐོབ་པར་འགྱུར། །