གཟའ། ཉི་མ་ལྷའི་གཟའ་སྐྱེས་པ་དང༌། །རྒྱལ་པོའི་བླ་གཟའ་རྒྱལ་རིགས་ཏེ། །ཞི་བ་དམར་སྐྱ་མེ་ཡི་ཁམས། །ལྷ་གསོལ་སྐྱེས་པས་བསྒྲུབ་པའི་ལས། །ཁྱད་པར་རྒྱལ་པོར་བསྐོ་བ་དང་། །ཕོ་བྲང་འདེབས་སོགས་རྒྱལ་སྲིད་དང༌། །རྒྱལ་རིགས་ཀྱིས་སྒྲུབ་བྱ་བའི་ལས། །མི་ཆེན་མཇལ་དང་ཕྱག་འབུལ་པ། །མེའི་ལས་ཁྱད་པར་དབང་དྲག་ཧོ། །ཐབ་བཅའ་བུ་བཙས་རབ་ཏུ་བྱུང༌། །སྨན་སྦྱོར་ཁྲུས་དང་དྲི་ཡི་ལས། །དངོས་པོ་ཚུར་ལེན་རྟ་ཕྱུགས་འདུལ། །གསེར་ཤིང་རུས་པ་པགས་པའི་བཟོ། །འབྲོག་དགོན་ནགས་ཁྲོད་འགྲོ་བ་དང༌། །གསོན་སྟོན་ཡོ་ལངས་དགེ་ཤིས་སོགས། །གསོན་པོའི་བྱ་བ་སྒྲུབ་པ་བཟང༌། །ཁྱད་པར་ཉིན་མོ་ཟླ་བའི་སྨད། །བྱང་བགྲོད་དུས་དང་སེང་ཁྱིམ་སླེབས། །དར་བའི་དུས་སུ་སྟོབས་ཆེའོ། །ལྷ་ཁང་ཁང་གསར་རྨང་གཞི་འདིང༌། །ཕྱིར་གཏོང་ལམ་ཞུགས་མནའ་སྐྱེལ་དགག །ནད་འདྲི་བག་མ་གོས་དྲ་གྱོན། །མི་ཤི་གཤིན་ཆོས་ཤིད་རོ་འདོན། །སྐྲ་སེན་འདྲེག་དང་སྦྲ་ཕྱར་འཚེམ། །གཏར་སྲེག་སྲི་མནན་བསྡུམས་བྱེད་པ། །རྫིང་ཡུར་ས་ཁ་ཞིང་འདེབས་དང༌། །མེ་ཏོག་ཤིང་འཛུགས་རབ་གནས་སྐྱས། །ཁྱིམ་འཛིན་བང་མཛོད་རྩིག་རྣམས་ངན།། ཚེས། བཅོ་བརྒྱད་སྐྲ་འཁྲུ་རབ་བྱུང་དང་། །དགེ་ལས་ཐབ་བཅའ་ས་བོན་འདེབས། །རྟེན་བཞེངས་ཆུ་རགས་སྦྱིན་སྲེག་དང་། །སྲི་མནན་དྲག་པོའི་ལས་རྣམས་བཟང་། །སྒོ་འཛུགས་ཐོག་དབུབ་ལམ་ཞུགས་བག །གཤིན་ལས་རྒྱལ་ས་གཏར་སྲེག་དང་། །ཕྱུགས་ཉོ་རྫིང་ཡུར་ཁྲོན་འདྲུ་ངན།། སྐར་མ། གྲོ་བཞིན་ཟློས་སྐར་ས་ཡི་ཁམས། །མྱུར་བར་འགྱུར་བ་བོན་པོའི་བླར། །རབ་གནས་རྟེན་བཞེངས་རྒྱལ་སར་བསྐོ། །བློ་གྲོས་གཞི་འདིང་རྫིང་ཡུར་འདྲུ། །ཆུ་ལས་སོ་ནམ་སྐྱིད་སྟོན་དང༌། །དགེ་ལས་ཚེ་གཡང་གཉེན་སྒྲིག་པ། །བག་མ་ཚུར་ལེན་ལྷ་གསོལ་བ། །དྲ་གྱོན་རྒྱན་འདོགས་ཁྱིམ་གསར་འཛིན། །ཕར་རྒོལ་བང་མཛོད་རྩིག་དང་འབྱེད། །བཟློག་རིམ་མོ་རྩིས་འཐབ་མོ་བསྡུམས། །སྨན་སྦྱོར་གཏར་སྲེག་ས་ཁ་དབྱེ། །ས་བོན་ནོར་འཇལ་རྟ་གླང་འདུལ། །ལམ་ཞུགས་ཚོང་སོགས་བརྟན་མིན་དང༌། །མྱུར་འགྲུབ་རྒྱས་པའི་ལས་རྣམས་བཟང༌། །རབ་བྱུང་བོན་ཆོག་བུ་ལོན་འཇལ། །གསོན་ཆོས་མཁར་ལས་སྲི་མནན་དང་། །རྐུན་ཇག་ཤིད་ཀྱི་སྟོན་མོ་ངན།། འབྱུང་འཕྲོད། ས་མེ་འཕྲད་པ་སྲེག་པའི་སྦྱོར། །སྲེག་པའི་སྦྱོར་བས་སྡུག་བསྔལ་བསྐྱེད། །དམག་འདྲེན་དགྲ་གཞོམ་དྲག་ལས་རྩོད། །ཕ་རོལ་སྡུག་བསྔལ་བསྐྱེད་ཀུན་བྱ།། སྦྱོར་བ། མཛའ་བོ་ཀུན་དང་མཛའ་བར་འགྱུར། གནམ་སྒོ། དུར་གྱི་གནམ་སྒོར་དུར་བཏབ་ན། །དུར་སྲི་བཏུད་ཅིང་ཐ་མར་འཕུང་།།  མེ་ལྷ། མེ་ལྷ་ས་སྟེང་གནས་པར་བརྟེན། །སྲེག་བླུགས་འབུལ་ན་སྒྲུབ་པ་པོར། །དངོས་གྲུབ་རྣམ་གཉིས་ཐོབ་པར་འགྱུར། །