གཟའ། སྤེན་པ་དབུལ་པོ་མ་ནིང་བྲན། །བྱིས་པའི་བླ་གཟའ་དམངས་རིགས་ཏེ། །དྲག་པོ་མདོག་ནག་སའི་ཁམས་ལ། །ཁང་པ་རྩིག་བཟུང་ཞལ་བསྲོ་བ། །ས་ཁ་ལམ་འཕྲང་རྫིང་ཡུར་འཆོས།། ཚེ་གཡང་འགུགས་དང་ནོར་ཕྱུགས་ལེན། །ནོར་སྒྲུབ་སྒྱེད་འཛུགས་རྐུན་ཇག་དམག །ཞིང་ལས་མེ་ཏོག་སྐྱེ་ཤིང་འཛུགས། །ལྕགས་དང་མདའ་མཚོན་ནག་པོའི་ལས། །སྲི་མནན་རྒྱལ་མཚན་བང་མཛོད་འཛིན། །ཡུལ་མཁར་མིང་འདོགས་བུད་མེད་བགྲོད། །ཁྱི་གསོ་ས་བོན་འདེབས་དང་རྩིས། །དབུལ་ཕོངས་བྲན་དང་བྱིས་པ་ཡི། །བསྒྲུབ་བྱའི་ལས་དང་དྲག་ལས་བཟང་། །ནག་ཕྱོགས་དར་དུས་ལྟོ་བགྲོད་མཚན། །དལ་འགྲོས་སྟོབས་ཆེ་ཁྱད་པར་དུ། །ཆུ་བུམ་ཁྱིམ་གནས་བསད་ལས་འགྲུབ། །རབ་བྱུང་རབ་གནས་ཁྲིམས་ལུགས་འཆའ། །འཆད་ཉན་སྨན་སྦྱོར་གོས་དྲ་གྱོན། །རྒྱན་འདོགས་ལྷ་གསོལ་རྒྱལ་ས་འཛིན། །ནོར་ཕྱུགས་ས་ཞིང་ཡུལ་མཁར་རྣམས། །ཕྱིར་གཏོང་སྐྲ་འཁྲུ་སྐྲ་སེན་འདྲེག །གསོན་དགེ་བག་མ་གཤིན་གྱི་ལས། །གཏར་སྲེག་ཕྲུ་སློག་ཟློག་པ་ཚོང་། །ལྷ་ཁང་རྟེན་བཞེངས་བྲན་བརྟེན་བསྡུམས། །རྟ་དྲེལ་སྒ་རྒྱག་སྦྲ་ཕྱར་འཚེམ། །རྒྱལ་པོར་ཕྱག་མཆོད་ཞལ་ཆེ་སྐྱས། །ཞི་དང་རྒྱས་པའི་ལས་རྣམས་ངན།། ཚེས། ཉེར་བདུན་ལམ་ཞུགས་སྐྲ་འཁྲུ་གཤིན། །འབྲུ་འདེབས་ཐབ་བཅའ་རྒྱས་ལས་བཟང་། །རབ་གནས་རྒྱལ་ས་ལྷ་རྟེན་བཞེངས་། །དྲན་བསྟེན་ནོར་ཉོ་བག་མ་དང་། །སྦྱིན་སྲེག་ཤྭ་རགས་རྩིགས་པ་ངན།། སྐར་མ། ནམ་གྲུ་གྲུབ་སྐར་ཆུ་ཡི་ཁམས། །མི་བརྟན་འགྱུར་བ་རྩིས་པའི་བླར། །རབ་བྱུང་ཆོས་འཆད་རབ་གནས་དབང༌། །ལྷ་སྒྲུབ་སྡོམ་འབོབས་རྒྱལ་སར་བསྐོ། །མཁར་ལས་ཞལ་ཆེ་ལྷ་གཡང་སྨན། །མཆོད་ཆོག་གོང་མར་ཞུ་ནོར་འབུལ། །དགེ་ལས་སྟོན་མོ་ཕྱུགས་འགྱེད་ཚོང༌། །ས་ཁ་ས་བོན་སྐྱེ་ཤིང་འཛུགས། །རོ་དྲང་གཤིན་ལས་ཤིད་དང་སྐྱས། །མིང་འདོགས་གཏར་སྲེག་སྐྲ་འཁྲུ་བ། །རིན་ཆེན་འབྲུ་སྒྲུབ་བང་མཛོད་བཅའ། །གོས་གྱོན་དབྱིག་བླང་ཁྱིམ་གསར་འཛིན། །ཆུ་བསྒྱུར་ལམ་འཆོས་གསོན་གྱི་ལས། །རང་དོན་མྱུར་སྒྲུབ་ལས་རྣམས་བཟང་། །གོས་འདྲ་ལམ་ཞུགས་ཆུ་རགས་བསྡུམས། །འབྲུ་ནོར་ཕྱིར་གཏོང་བུ་འབོགས་པ། །དམག་ཇག་འཕྲོག་འཇོམས་བརྟན་ལས་དང༌། །ཐབ་བཅའ་བཟློག་རིམ་སྤྲ་ཕྱར་འཚེམ། །ཐུག་འགྱེད་གསེབ་སྤྲོད་བག་མ་ངན།། འབྱུང་འཕྲོད། ས་ཆུ་འཕྲད་པ་ལང་ཚོ་སྦྱོར། །ལང་ཚོ་སྦྱོར་བས་ཤིན་ཏུ་སྐྱིད། །དགའ་སྟོན་བྱ་ཞིང་ཆེ་སར་འདོན། །གོས་གྱོན་རྒྱན་འདོགས་རོལ་རྩེད་བཟང་།། སྦྱོར་བ། ཚེ་ལྡན་ཚེ་རིང་དཔལ་ཐོབ་བོ། གནམ་སྒོ། བག་མའི་གནམ་སྒོར་བག་མ་ཡི། །གཏོང་ལེན་བྱས་ན་ཡུགས་ས་འབབ།།  མེ་ལྷ། མེ་ལྷ་ས་སྟེང་གནས་པར་བརྟེན། །སྲེག་བླུགས་འབུལ་ན་སྒྲུབ་པ་པོར། །དངོས་གྲུབ་རྣམ་གཉིས་ཐོབ་པར་འགྱུར། །