གཟའ། ཟླ་བ་ཀླུ་གཟའ་བུད་མེད་བླ། །རྗེ་རིགས་དཀར་སེར་ཆུ་ཁམས་བཞི། །ལྷ་ཁང་རྨང་འདིང་རྟེན་བཞེངས་བཟོ།། དཀྱིལ་འཁོར་འབྲི་སྒྲུབ་རབ་གནས་བྱ། །བླ་མར་ཕྱག་ཡོན་ཀླུ་སྨན་གསོལ། །ཆར་དབབ་རྫིང་ཡུར་སོགས་ཆུའི་ལས། །གཉེན་བག་རྒྱན་འདོགས་བུད་མེད་ལས། །ཁྱད་པར་རྗེ་རིགས་དང་བཙུན་མོའི། །ལས་སྒྲུབ་སྨན་དཔྱད་བཅུད་ལེན་གཡང༌། །ཆང་བཙོ་ཁྲུས་དང་སྐྲ་སེན་འདྲེག །ཕོ་མོ་བཙས་དང་གོས་འདྲ་བྲན། །མེ་ཏོག་ཤིང་འཛུགས་ས་ཁ་འབྱེད། །ཞིང་འདེབས་ཁྱིམ་འཛིན་ཐབ་བཅའ་བ། །ལྟད་སྟོན་བསྡུམས་བྱ་རྟ་གླང་འདུལ། །དགེ་ཤིས་ཞི་རྒྱས་ལས་རྣམས་བཟང་། །ཁྱད་པར་ཕྱོགས་གཉིས་མཚན་མོ་དང༌། །བྱང་བགྲོད་ཀངྑའི་ཁྱིམ་དུ་སླེབས། །དར་བའི་དུས་སུ་སྟོབས་ཆེར་བརྗོད། །རབ་བྱུང་ཆོས་ཉན་གཡང་ཅན་ནོར། །ཕྱི་གཏོང་ལམ་ཞུགས་གོས་གྱོན་པ། །མཁར་ལས་ཆུ་རགས་རོ་སྲེག་པ། །སྲི་མནན་ཁ་མཆུ་དགྲར་རྒོལ་བ། །དབང་དང་དྲག་པོའི་ལས་རྣམས་ངན།། ཚེས། ཚེས་གཅིག་དཀར་ཕྱོགས་འགོ་འཛུགས་དང་། །ལམ་ཞུགས་དོན་གཉེར་ས་ཁ་དབྱེ། །དཀྱིལ་འཁོར་སྒྲུབ་མཆོད་ཞི་ལས་བཟང་། །བྲན་བརྟེན་ནོར་ཕྱུགས་ཉོ་བ་འབྲིང་། །ཆོས་ཉན་སྐྲ་འཁྲུ་ནོར་ཕྱིར་གཏོང་། །སྲི་མནན་བཟློག་པ་ལྷ་གསོལ་དང་། །གཤིན་གྱི་ལས་དང་བག་མ་ངན།། སྐར་མ། བྲ་ཉེ་དམེ་སྐར་མེ་ཡི་ཁམས། །འཕུང་བྱེད་ར་ཡི་བླ་སྐར་ལ། །བྲན་བརྟེན་རང་འཐག་སྒྱེད་བུ་འཛུགས། །བྲེས་རྩིག་ར་ཕྱུགས་ལེན་དང་ཉོ། །དགྲ་ལིང་འདྲི་དང་མནན་ཟོར་འཕེན། །འདྲེ་བསྐྲད་ཡུགས་སྐྲ་འཁྲུ་བ་དང་། །རིགས་ངན་དབྱེན་སྦྱོར་གཏད་སེལ་འཛུགས། །རྐུན་མ་ལིངས་བྱེད་རིགས་ངན་ཤིད། །གཞི་རྩོད་དྲག་པོའི་ལས་ཀུན་བཟང་། །ལམ་ཞུགས་ལྷ་གསོལ་ས་བོན་འདེབས། །མཁར་ལས་ལྷ་ཁང་རྟེན་བཞེངས་བ། །རྒྱལ་ས་ཆེ་འདོན་གོས་དྲ་གྱོན། །མོ་རྩིས་བུ་བཙས་དུར་འདེབས་བག །བང་མཛོད་རྩིག་དང་ས་ཁ་འབྱེད། །ར་ཕྱུགས་ཕྱིར་གཏོང་གཡང་བསྟན་སྨན། །རིམ་གྲོ་གཏར་སྲེག་སྐྱེ་ཤིང་འཛུགས། །རྒྱལ་མཚན་བ་དན་འཕྱར་འཛུགས་བཟོ། །རབ་གནས་ལ་སོགས་ཞི་རྒྱས་དང༌། །དཀར་ཕྱོགས་དགེ་བའི་ལས་རྣམས་ངན།། འབྱུང་འཕྲོད། མེ་ཆུ་འཕྲད་པ་འཆི་བའི་སྦྱོར། །འཆི་བའི་སྦྱོར་བས་སྲོག་འཕྲོག་བྱེད། །ཕ་རོལ་གསོད་དང་དུག་སྦྱོར་དང་། །མཐུ་གཏད་ལ་སོགས་རིག་པས་བསྒྲུབ། སྦྱོར་བ། ཚེ་ལྡན་ཚེ་རིང་དཔལ་ཐོབ་བོ། གནམ་སྒོ། མགྲོན་གྱི་གནམ་སྒོར་དོན་གཉེར་དང་། །མགྲོན་བྱས་ཁྱིམ་དེ་གུད་པར་འགྱུར།།  མེ་ལྷ། མེ་ལྷ་ས་སྟེང་གནས་པར་བརྟེན། །སྲེག་བླུགས་འབུལ་ན་སྒྲུབ་པ་པོར། །དངོས་གྲུབ་རྣམ་གཉིས་ཐོབ་པར་འགྱུར། །