གཟའ། པ་སངས་སྟག་གཟིག་རྒྱལ་བློན་དང་། །བུད་མེད་བླ་གཟའ་བྲམ་ཟེའི་རིགས། །ཞི་བ་ས་ཁམས་སྣ་ཚོགས་མདོག །ཆོས་འཆད་རབ་བྱུང་རབ་གནས་དང་། །དཀྱིལ་འཁོར་སྔགས་སྒྲུབ་ལྷ་རྟེན་བཞེང་།། ལྷ་གསོལ་གཉེན་སྒྲིག་བག་མ་ཚོང༌། །ལམ་ཞུགས་ཁང་རྨང་སྦྲ་ཁྱིམ་འབུབས། །རྒྱལ་སར་འཇུག་སོགས་རྒྱལ་བློན་དང་། །བུད་མེད་ཀྱིས་བསྒྲུབ་བྱ་བའི་ལས། །དྲ་གྱོན་ལྟད་སྟོན་རྫིང་ཡུར་འདྲུ། །གྲོགས་བཙལ་འཁོར་བསྟེན་དྲི་སྨན་སྦྱོར། །གཏར་སྲེག་གཤིན་གྱི་བྱ་བ་སྤྱི།། ཆང་བཙོ་སྟོན་མོ་སྐྲ་འཁྲུ་འདྲེག །ས་ཁ་སོ་ནམ་ས་བོན་གདབ། །རིན་ཆེན་ལྔའི་བཟོ་ཁྱིམ་འཛིན་པ། །མོ་རྩིས་རིག་སློབ་བསྡུམས་ཐབ་བཅའ། །རྟ་རྒྱུག་སྒ་རྒྱག་རྩེད་མོ་གྲོས། །རྒྱན་འདོགས་བུད་མེད་དག་ལ་བགྲོད། །ཆུ་རགས་དཀར་ཕྱོགས་རིམ་གྲོ་སོགས། །ཞི་དང་རྒྱས་པའི་ལས་རྣམས་བཟང་། །དཀར་ཕྱོགས་དར་དུས་ལྷོ་བགྲོད་ཉིན། །དལ་འགྲོས་སྟོབས་ཆེ་ཁྱད་པར་དུ། །གླང་སྲང་ཁྱིམ་དུ་དབང་ལས་འགྲུབ། །འཕོ་སྐྱས་ཤགས་འདེབས་འཁོན་བར་པ། །ནད་ཐེབས་ཇག་རྐུན་དུར་སྦ་སྲེག །བུ་ལོན་འཇལ་དང་དྲག་ལས་ངན།། ཚེས། བཅུ་བདུན་ལམ་ཞུགས་གཤིན་ལས་དང་། །ཐབ་བཅའ་མཁར་ལས་རྫིང་ཁྲོན་འདྲུ། །ས་བོན་འདེབས་དང་རྒྱས་ལས་བཟང་། །ཆུ་རགས་སྐྲ་འཁྲུ་སྦྱིན་སྲེག་དང་། །ཕྱུགས་ཉོ་བ་དང་བག་མ་ངན།། སྐར་མ། སྨིན་དྲུག་ཟློས་སྐར་མེ་ཡི་ཁམས། །བཏང་སྙོམས་ཅན་ཏེ་བུད་མེད་བླར། །ཆོས་སློབ་ལྷ་ཁང་མཆོད་རྟེན་གསོ། །ལྷ་གསོལ་ཚེ་གཡང་རྒྱལ་སར་བསྐོ། །ཚུར་ལེན་སྐྱིད་སྟོན་སྦྲ་ཁྱིམ་འབུབས། །ཐབ་བཅའ་ལྷས་རྩིག་ར་ལུག་ཉོ། །སྦྱིན་སྲེག་རིན་ཆེན་བཞུ་དང་བཟོ། །མཚོན་ཆ་ཁྱིམ་འཛིན་གོས་གྱོན་པ། །རྐུན་མ་ཕྱུགས་འགྱེད་རྟ་བོང་སྒ། །སྐྲ་འཁྲུ་རྒྱན་འདོགས་བུད་མེད་བརྟེན། །བུ་བཙས་ལྟད་མོ་གཉེན་འཕྲད་དང༌། །ཆུ་རགས་ཡོན་འབུལ་སྨན་སྦྱོར་རྩིས། །མེ་ལས་དྲག་པོའི་ལས་སྒྲུབ་བཟང་། །གོས་ཉོ་ཕར་འཇལ་ལམ་ཞུགས་བག །གཤིན་ལས་གོས་དྲ་འཕོ་སྐྱས་མཁར། །རྒྱལ་མཚན་ཕན་འཛུགས་བང་མཛོད་དབྱེ། །རྫིང་ཡུར་ས་ཁ་ས་བོན་འདེབས། །བུ་འབོགས་སྐྱེ་ཤིང་འཛུགས་རྣམས་ངན།། འབྱུང་འཕྲོད། ས་མེ་འཕྲད་པ་སྲེག་པའི་སྦྱོར། །སྲེག་པའི་སྦྱོར་བས་སྡུག་བསྔལ་བསྐྱེད། །དམག་འདྲེན་དགྲ་གཞོམ་དྲག་ལས་རྩོད། །ཕ་རོལ་སྡུག་བསྔལ་བསྐྱེད་ཀུན་བྱ།། སྦྱོར་བ། མཆོག་ཅན་དགྲ་ལས་རྒྱལ་བ་ཡིན། གནམ་སྒོ། བག་མའི་གནམ་སྒོར་བག་མ་ཡི། །གཏོང་ལེན་བྱས་ན་ཡུགས་ས་འབབ།། ཀླུ་ཐེབས། ཀླུ་ཐེབས་དུས་སུ་ཆར་དབབ་པ། །ཀླུ་ཆོག་ཀླུ་གཏོར་གཏོང་བ་དང་། །ཀླུ་ལ་མནན་གཏད་སྐྱེལ་སོགས་བཟང་། ། མེ་ལྷ། མེ་ལྷ་ས་སྟེང་གནས་པ་ལས། །སྲེག་བླུགས་འབུལ་ན་སྒྲུབ་པ་པོར། །དངོས་གྲུབ་རྣམ་གཉིས་ཐོབ་པར་འགྱུར། །