གཟའ། ལྷག་པ་གནོད་སྦྱིན་མ་ནིང་དང་། །རྒྱལ་བུའི་བླ་གཟའ་དམངས་རིགས་ཏེ། །ཞི་བ་སྔོ་ལྗང་ཆུ་ཡི་ཁམས། །དབང་བསྐུར་རབ་གནས་བསྟན་བཅོས་རྩོམ། །སྒྲ་སྙན་ཡིག་རྩིས་ཆོས་འཆད་ཉན།། སྔགས་བཟླ་རིན་ཆེན་ས་ཆུའི་ལས། །བསྡུམ་བྱ་འབྲེལ་སྟེག་ཁྱིམ་གསར་འཛིན། །མཁར་ལས་ལྷ་ཁང་རྟེན་བཞེངས་པ། །རྫིང་ཡུར་ཁྲོན་འདྲུ་བང་མཛོད་འཛིན། །སྐྲ་འཁྲུ་རྒྱན་འདོགས་གོས་དྲ་གྱོན། །གཡང་བསླན་བྲན་བསྟེན་གཉེན་སྒྲིག་ཚོང་། །ས་ཁ་འབྲུ་འདེབས་སྐྱེ་ཤིང་འཛུགས། །མེ་ཏོག་ལས་དང་འཕོ་སྐྱས་བཟོ། །ཡོན་འབུལ་ཕྱུགས་འདུལ་གཏར་སྲེག་བྱ།། རྟ་དྲེལ་སྒ་རྒྱག་གསོན་ལས་ཤིད། །མོ་རྩིས་རྒྱལ་བུའི་ཁྲུས་ཚུར་ལེན། །རང་དོན་སྒྲུབ་དང་དཀར་ཕྱོགས་དགེ། །ཞི་དང་རྒྱས་པའི་ལས་རྣམས་བཟང་། །དཀར་པོའི་སྟོད་དང་ནག་པོའི་སྨད། །ལྷོ་བགྲོད་ཉིན་མཚན་གཉིས་ཀ་དང༌། །མྱུར་འགྲོས་དར་དུས་འཁྲིག་བུ་མོའི།། ཁྱིམ་དུ་སླེབས་ཚེ་སྟོབས་ཆེ་ཞིང་། །ཁྱད་པར་རྒྱས་པའི་ལས་ལ་བསྔགས། །རབ་བྱུང་ཕྱིར་གཏོང་དུར་གདབ་པ། །བག་མ་ཐབ་བཅའ་ཆང་བཙོ་མདོས། །ཆུ་རགས་སྨན་སྦྱོར་རྐུན་ཇག་དམག །རྩོད་དང་ཞལ་ཆེ་བཟློག་པ་བྱེད། །དྲག་པོའི་ལས་རྣམས་ངན་པས་སྤང༌།། ཚེས། བཅོ་བརྒྱད་སྐྲ་འཁྲུ་རབ་བྱུང་དང་། །དགེ་ལས་ཐབ་བཅའ་ས་བོན་འདེབས། །རྟེན་བཞེངས་ཆུ་རགས་སྦྱིན་སྲེག་དང་། །སྲི་མནན་དྲག་པོའི་ལས་རྣམས་བཟང་། །སྒོ་འཛུགས་ཐོག་དབུབ་ལམ་ཞུགས་བག །གཤིན་ལས་རྒྱལ་ས་གཏར་སྲེག་དང་། །ཕྱུགས་ཉོ་རྫིང་ཡུར་ཁྲོན་འདྲུ་ངན།། སྐར་མ། ནམ་གྲུ་གྲུབ་སྐར་ཆུ་ཡི་ཁམས། །མི་བརྟན་འགྱུར་བ་རྩིས་པའི་བླར། །རབ་བྱུང་ཆོས་འཆད་རབ་གནས་དབང༌། །ལྷ་སྒྲུབ་སྡོམ་འབོབས་རྒྱལ་སར་བསྐོ། །མཁར་ལས་ཞལ་ཆེ་ལྷ་གཡང་སྨན། །མཆོད་ཆོག་གོང་མར་ཞུ་ནོར་འབུལ། །དགེ་ལས་སྟོན་མོ་ཕྱུགས་འགྱེད་ཚོང༌། །ས་ཁ་ས་བོན་སྐྱེ་ཤིང་འཛུགས། །རོ་དྲང་གཤིན་ལས་ཤིད་དང་སྐྱས། །མིང་འདོགས་གཏར་སྲེག་སྐྲ་འཁྲུ་བ། །རིན་ཆེན་འབྲུ་སྒྲུབ་བང་མཛོད་བཅའ། །གོས་གྱོན་དབྱིག་བླང་ཁྱིམ་གསར་འཛིན། །ཆུ་བསྒྱུར་ལམ་འཆོས་གསོན་གྱི་ལས། །རང་དོན་མྱུར་སྒྲུབ་ལས་རྣམས་བཟང་། །གོས་འདྲ་ལམ་ཞུགས་ཆུ་རགས་བསྡུམས། །འབྲུ་ནོར་ཕྱིར་གཏོང་བུ་འབོགས་པ། །དམག་ཇག་འཕྲོག་འཇོམས་བརྟན་ལས་དང༌། །ཐབ་བཅའ་བཟློག་རིམ་སྤྲ་ཕྱར་འཚེམ། །ཐུག་འགྱེད་གསེབ་སྤྲོད་བག་མ་ངན།། འབྱུང་འཕྲོད། ཆུ་གཉིས་ནང་འཕྲད་བདུད་རྩི་སྦྱོར། །བདུད་རྩི་སྦྱོར་བས་ཚེ་སྟོབས་འཕེལ། །སྨན་སྦྱོར་ཁྲུས་བྱེད་བག་མ་ལེན། །ཚེ་དབང་ཚེ་སྒྲུབ་ཆོ་ག་དང་། །གཉེན་དང་ཚོང་བསྐྱེད་འཕེལ་ལས་བཟང་།། སྦྱོར་བ། འཕེལ་ལ་ཟས་ནོར་འཕེལ་བར་བཤད། གནམ་སྒོ། དུར་གྱི་གནམ་སྒོར་དུར་བཏབ་ན། །དུར་སྲི་བཏུད་ཅིང་ཐ་མར་འཕུང་།།