གཟའ། ཟླ་བ་ཀླུ་གཟའ་བུད་མེད་བླ། །རྗེ་རིགས་དཀར་སེར་ཆུ་ཁམས་བཞི། །ལྷ་ཁང་རྨང་འདིང་རྟེན་བཞེངས་བཟོ།། དཀྱིལ་འཁོར་འབྲི་སྒྲུབ་རབ་གནས་བྱ། །བླ་མར་ཕྱག་ཡོན་ཀླུ་སྨན་གསོལ། །ཆར་དབབ་རྫིང་ཡུར་སོགས་ཆུའི་ལས། །གཉེན་བག་རྒྱན་འདོགས་བུད་མེད་ལས། །ཁྱད་པར་རྗེ་རིགས་དང་བཙུན་མོའི། །ལས་སྒྲུབ་སྨན་དཔྱད་བཅུད་ལེན་གཡང༌། །ཆང་བཙོ་ཁྲུས་དང་སྐྲ་སེན་འདྲེག །ཕོ་མོ་བཙས་དང་གོས་འདྲ་བྲན། །མེ་ཏོག་ཤིང་འཛུགས་ས་ཁ་འབྱེད། །ཞིང་འདེབས་ཁྱིམ་འཛིན་ཐབ་བཅའ་བ། །ལྟད་སྟོན་བསྡུམས་བྱ་རྟ་གླང་འདུལ། །དགེ་ཤིས་ཞི་རྒྱས་ལས་རྣམས་བཟང་། །ཁྱད་པར་ཕྱོགས་གཉིས་མཚན་མོ་དང༌། །བྱང་བགྲོད་ཀངྑའི་ཁྱིམ་དུ་སླེབས། །དར་བའི་དུས་སུ་སྟོབས་ཆེར་བརྗོད། །རབ་བྱུང་ཆོས་ཉན་གཡང་ཅན་ནོར། །ཕྱི་གཏོང་ལམ་ཞུགས་གོས་གྱོན་པ། །མཁར་ལས་ཆུ་རགས་རོ་སྲེག་པ། །སྲི་མནན་ཁ་མཆུ་དགྲར་རྒོལ་བ། །དབང་དང་དྲག་པོའི་ལས་རྣམས་ངན།། ཚེས། ཚེས་དགུ་རྒྱལ་ས་སྲི་མནན་དང་། །ལམ་ཞུགས་ཞི་བའི་ལས་རྣམས་བཟང་། །སྐྲ་འཁྲུ་བག་མ་གཡོག་བསྟེན་པ། །ནོར་ཕྱུགས་ཉོ་དང་གཤིན་ལས་ངན།། སྐར་མ། སྣྲོན་ནི་འགྲོན་སྐར་ས་ཡི་ཁམས། །འབྲས་བུ་ངན་པ་ར་ཡི་བླར། །རབ་བྱུང་དཀྱིལ་འཁོར་འབྲི་སྒྲུབ་དབང་། །རབ་གནས་རྒྱལ་སར་བསྐོ་བ་སོགས། །རྒྱལ་པོའི་ལས་དང་ལྷ་གཡང་ཚེ། །བཀྲ་ཤིས་ཞུ་གསོལ་དགེ་ལས་སོན། །སློབ་གཉེར་རྒྱན་སྤྲོད་བུ་ལོན་སྟེག །སྐྱེ་ཤིང་ཟམ་འཛུགས་ཆུ་རྐ་ལེན། །ཁང་བཟང་འཇུག་དང་ཡུལ་གྲོགས་འཛིན། །ནོར་བྲང་གཏར་སྲེག་ཐུག་འགྱེད་དང་། །རྟ་ཕྱུགས་ཁྱུར་གཏོང་གསོན་གྱི་ལས། །ཕུར་སྒྲུབ་གཏད་མནན་འཇོམས་འཕྲོག་རྐུ། །དམག་སོགས་དྲག་ལས་ངན་ཐབས་བཟང༌། །གོས་དྲ་གོས་གྱོན་རྟེན་བཞེང་བ། །མོ་རྩིས་སྨན་སྦྱོར་འཐབ་མོ་བསྡུམས། །བྲན་བརྟེན་ར་ཕྱུགས་ཕྱིར་གཏོང་དང༌། །མིང་འདོགས་དོན་གཉེར་བཤས་བྱེད་པ། །བག་མ་གཏོང་ལེན་གཤིན་ལས་ངན།། འབྱུང་འཕྲོད། ས་ཆུ་འཕྲད་པ་ལང་ཚོ་སྦྱོར། །ལང་ཚོ་སྦྱོར་བས་ཤིན་ཏུ་སྐྱིད། །དགའ་སྟོན་བྱ་ཞིང་ཆེ་སར་འདོན། །གོས་གྱོན་རྒྱན་འདོགས་རོལ་རྩེད་བཟང་།། སྦྱོར་བ། སེལ་བར་ལམ་སེལ་བྱེད་པ་བཟང་། གནམ་སྒོ། ཤིད་ཀྱི་གནམ་སྒོར་ཤིད་སྟོན་དག །བྱས་ན་འཕྲལ་དུ་གཤིན་ལས་འབབ།།  མེ་ལྷ། མེ་ལྷ་ས་སྟེང་གནས་པ་ལས། །སྲེག་བླུགས་འབུལ་ན་སྒྲུབ་པ་པོར། །དངོས་གྲུབ་རྣམ་གཉིས་ཐོབ་པར་འགྱུར། །