གཟའ། ལྷག་པ་གནོད་སྦྱིན་མ་ནིང་དང་། །རྒྱལ་བུའི་བླ་གཟའ་དམངས་རིགས་ཏེ། །ཞི་བ་སྔོ་ལྗང་ཆུ་ཡི་ཁམས། །དབང་བསྐུར་རབ་གནས་བསྟན་བཅོས་རྩོམ། །སྒྲ་སྙན་ཡིག་རྩིས་ཆོས་འཆད་ཉན།། སྔགས་བཟླ་རིན་ཆེན་ས་ཆུའི་ལས། །བསྡུམ་བྱ་འབྲེལ་སྟེག་ཁྱིམ་གསར་འཛིན། །མཁར་ལས་ལྷ་ཁང་རྟེན་བཞེངས་པ། །རྫིང་ཡུར་ཁྲོན་འདྲུ་བང་མཛོད་འཛིན། །སྐྲ་འཁྲུ་རྒྱན་འདོགས་གོས་དྲ་གྱོན། །གཡང་བསླན་བྲན་བསྟེན་གཉེན་སྒྲིག་ཚོང་། །ས་ཁ་འབྲུ་འདེབས་སྐྱེ་ཤིང་འཛུགས། །མེ་ཏོག་ལས་དང་འཕོ་སྐྱས་བཟོ། །ཡོན་འབུལ་ཕྱུགས་འདུལ་གཏར་སྲེག་བྱ།། རྟ་དྲེལ་སྒ་རྒྱག་གསོན་ལས་ཤིད། །མོ་རྩིས་རྒྱལ་བུའི་ཁྲུས་ཚུར་ལེན། །རང་དོན་སྒྲུབ་དང་དཀར་ཕྱོགས་དགེ། །ཞི་དང་རྒྱས་པའི་ལས་རྣམས་བཟང་། །དཀར་པོའི་སྟོད་དང་ནག་པོའི་སྨད། །ལྷོ་བགྲོད་ཉིན་མཚན་གཉིས་ཀ་དང༌། །མྱུར་འགྲོས་དར་དུས་འཁྲིག་བུ་མོའི།། ཁྱིམ་དུ་སླེབས་ཚེ་སྟོབས་ཆེ་ཞིང་། །ཁྱད་པར་རྒྱས་པའི་ལས་ལ་བསྔགས། །རབ་བྱུང་ཕྱིར་གཏོང་དུར་གདབ་པ། །བག་མ་ཐབ་བཅའ་ཆང་བཙོ་མདོས། །ཆུ་རགས་སྨན་སྦྱོར་རྐུན་ཇག་དམག །རྩོད་དང་ཞལ་ཆེ་བཟློག་པ་བྱེད། །དྲག་པོའི་ལས་རྣམས་ངན་པས་སྤང༌།། ཚེས། ཉི་ཤུ་དགུ་ལ་ལམ་ཞུགས་དང་། །དགྲ་འདུལ་ཧོམ་པར་ཐོག་སེར་དབབ། །བཟློག་པ་སྲི་མནན་དྲག་ལས་བཟང་། །ཆོས་བྱ་ཆང་བཙོ་ས་བོན་འདེབས། །སྐྲ་འཁྲུ༌བྲན་བསྟེན་རྐང་འགྲོས་འདུལ། །རབ་གནས་བག་མ་རྒྱལ་ས་གཤིན། །གཏར་སྲེག་རྟེན་བཞེངས་ཕྱུགས་ཉོ་ངན།། སྐར་མ། ལག་ནི་དགྲ་སྐར་ཆུ་ཡི་ཁམས། །འབྲས་བུ་ངན་པ་བཤན་པའི་བླར། །རབ་བྱུང་རབ་གནས་བཟོ་ཡིག་སློབ། །ཞལ་ཆེ་སྲི་མནན་ས་བོན་འདེབས། །ཁྲོན་འོབས་རྫིང་འདྲུ་ཆང་འཚོང་བ། །སྣུམ་འཚིར་ཕྱུགས་ཉོ་ཚེ་གཡང་འགུགས། །རྒྱན་སྤྲོད་སྐྲ་འཁྲུ་བོན་ཆོག་བྱ། །དགེ་ལས་རོ་ལམ་འཇལ་ལེན་བྱེད། །ཞུ་འབུལ་ཐུག་འགྱེད་དམག་ཇག་དང༌། །གསོད་རྐུ་དགྲ་སྲི་བྲུབས་པ་སོགས། །ངན་སྤྱོད་དྲག་པོའི་ལས་རྣམས་བཟང་། །གཉེན་སྦྱོར་བག་མ་ཕྱུགས་འཇལ་བ། །ལྷ་གསོལ་གཤིན་ལས་གོས་དྲ་གྱོན། །ལམ་ཞུགས་རྒྱལ་ས་བསྡུམས་དང་སྐྱས། །ལྷ་ཁང་རྟེན་བཞེངས་བ་དན་འཛུགས། །གཏར་སྲེག་ཐབ་བཅའ་ཆུ་རགས་རྒྱག །སྦྲ་ཕྱར་འཚེམ་པ་ལ་སོགས་ངན།། འབྱུང་འཕྲོད། ཆུ་གཉིས་ནང་འཕྲད་བདུད་རྩི་སྦྱོར། །བདུད་རྩི་སྦྱོར་བས་ཚེ་སྟོབས་འཕེལ། །སྨན་སྦྱོར་ཁྲུས་བྱེད་བག་མ་ལེན། །ཚེ་དབང་ཚེ་སྒྲུབ་ཆོ་ག་དང་། །གཉེན་དང་ཚོང་བསྐྱེད་འཕེལ་ལས་བཟང་།། སྦྱོར་བ། ཀུན་འཇོམས་ལ་ནི་མཛེ་ནད་ལྡང་། གནམ་སྒོ། ཤིད་ཀྱི་གནམ་སྒོར་ཤིད་སྟོན་དག །བྱས་ན་འཕྲལ་དུ་གཤིན་ལས་འབབ།།