གཟའ། པ་སངས་སྟག་གཟིག་རྒྱལ་བློན་དང་། །བུད་མེད་བླ་གཟའ་བྲམ་ཟེའི་རིགས། །ཞི་བ་ས་ཁམས་སྣ་ཚོགས་མདོག །ཆོས་འཆད་རབ་བྱུང་རབ་གནས་དང་། །དཀྱིལ་འཁོར་སྔགས་སྒྲུབ་ལྷ་རྟེན་བཞེང་།། ལྷ་གསོལ་གཉེན་སྒྲིག་བག་མ་ཚོང༌། །ལམ་ཞུགས་ཁང་རྨང་སྦྲ་ཁྱིམ་འབུབས། །རྒྱལ་སར་འཇུག་སོགས་རྒྱལ་བློན་དང་། །བུད་མེད་ཀྱིས་བསྒྲུབ་བྱ་བའི་ལས། །དྲ་གྱོན་ལྟད་སྟོན་རྫིང་ཡུར་འདྲུ། །གྲོགས་བཙལ་འཁོར་བསྟེན་དྲི་སྨན་སྦྱོར། །གཏར་སྲེག་གཤིན་གྱི་བྱ་བ་སྤྱི།། ཆང་བཙོ་སྟོན་མོ་སྐྲ་འཁྲུ་འདྲེག །ས་ཁ་སོ་ནམ་ས་བོན་གདབ། །རིན་ཆེན་ལྔའི་བཟོ་ཁྱིམ་འཛིན་པ། །མོ་རྩིས་རིག་སློབ་བསྡུམས་ཐབ་བཅའ། །རྟ་རྒྱུག་སྒ་རྒྱག་རྩེད་མོ་གྲོས། །རྒྱན་འདོགས་བུད་མེད་དག་ལ་བགྲོད། །ཆུ་རགས་དཀར་ཕྱོགས་རིམ་གྲོ་སོགས། །ཞི་དང་རྒྱས་པའི་ལས་རྣམས་བཟང་། །དཀར་ཕྱོགས་དར་དུས་ལྷོ་བགྲོད་ཉིན། །དལ་འགྲོས་སྟོབས་ཆེ་ཁྱད་པར་དུ། །གླང་སྲང་ཁྱིམ་དུ་དབང་ལས་འགྲུབ། །འཕོ་སྐྱས་ཤགས་འདེབས་འཁོན་བར་པ། །ནད་ཐེབས་ཇག་རྐུན་དུར་སྦ་སྲེག །བུ་ལོན་འཇལ་དང་དྲག་ལས་ངན།། ཚེས། ཚེས་གཉིས་རབ་གནས་རྒྱལ་སར་འཇུག །ཐབ་བཅའ་འབྲུ་འདེབས་རྫིང་ཁྲོན་འདྲུ། །ཕྱུགས་ཉོས་སྟོང་འཕེལ་རྒྱས་ལས་བཟང་། །སྐྲ་འཁྲུ་ལམ་ཞུགས་དོན་གཉེར་བ། །ཆུ་རགས་རྒྱག་དང་སྦྱིན་སྲེག་ངན།། སྐར་མ། ནབས་སོ་གཡང་སྐར་རླུང་གི་ཁམས། །མྱུར་ཞིང་འགྱུར་བ་ལུག་གི་བླར། །རབ་བྱུང་རབ་གནས་ཆོས་འཆད་ཉན། །སྦྱིན་སྲེག་ལྷ་གསོལ་གཡང་འགུགས་པ། །དཀྱིལ་འཁོར་འདྲི་སྒྲུབ་ས་བོན་འདེབས། །ལྷ་ཁང་མཁར་རྨང་འདིངས་ཐོག་འབུབས། །རྟེན་བཞེངས་ཚུར་ལེན་གོས་དྲ་གྱོན། །དོན་གཉེར་རྒྱན་སྤྲོད་རྒྱལ་སར་བསྐོ། །བག་མ་ལེན་དང་གཙུག་ཕུད་འཇོག །སྒྱེད་འཛུགས་ཐུག་འགྱེད་བུ་ལོན་འཇལ། །ཞུ་གསོལ་བཟློག་ཟོར་འཐབ་མོ་ཤིད། །བ་ལང་སྦྱིན་དང་བང་མཛོད་བཅའ། །ས་ཁ་ཞིང་འདེབས་སྦྲ་ཕྱར་འཚེམ། །ཁྱིམ་འཛིན་བྲན་བརྟེན་ལམ་ཞུགས་ཚོང༌། །རྟ་བོང་སྒ་རྒྱག་གཏར་སྲེག་བཅོས། །མིང་འདོགས་ལུག་ལེན་གསོན་སྟོན་དང༌། །ཡང་ཡང་བྱ་བ་རྣམས་ལ་བཟང༌། །བུ་འབོགས་རོ་འདོན་འབྲིང་པོ་སྟེ། །དམག་ཇག་ཕར་རྒོལ་ལུག་ཕྱིར་འཇལ། །ནོར་གཏོང་ས་འཛིན་སྐྱེ་ཤིང་འཛུགས། །ཐབ་བཅའ་སྡིག་ལས་བྱ་བ་ངན།། འབྱུང་འཕྲོད། ས་རླུང་འཕྲད་པ་མི་འཕྲོད་སྦྱོར། །མི་འཕྲོད་སྦྱོར་བས་ཟས་ནོར་འཛད། །རྐུན་ཇག་འཇོམས་འཕྲོག་བྱེད་པ་སོགས། །མྱ་ངན་འོང་བས་དོན་མི་འགྲུབ།། སྦྱོར་བ། ཀུན་འཇོམས་ལ་ནི་མཛེ་ནད་ལྡང་། གནམ་སྒོ། ཚོང་གི་གནམ་སྒོར་ཚོང་བྱས་ན། །ཚོང་ཉེས་གོད་ཁ་རྒྱུན་མི་ཆད།།  མེ་ལྷ། མེ་ལྷ་ས་སྟེང་གནས་པ་ལས། །སྲེག་བླུགས་འབུལ་ན་སྒྲུབ་པ་པོར། །དངོས་གྲུབ་རྣམ་གཉིས་ཐོབ་པར་འགྱུར། །