གཟའ། ཉི་མ་ལྷའི་གཟའ་སྐྱེས་པ་དང༌། །རྒྱལ་པོའི་བླ་གཟའ་རྒྱལ་རིགས་ཏེ། །ཞི་བ་དམར་སྐྱ་མེ་ཡི་ཁམས། །ལྷ་གསོལ་སྐྱེས་པས་བསྒྲུབ་པའི་ལས། །ཁྱད་པར་རྒྱལ་པོར་བསྐོ་བ་དང་། །ཕོ་བྲང་འདེབས་སོགས་རྒྱལ་སྲིད་དང༌། །རྒྱལ་རིགས་ཀྱིས་སྒྲུབ་བྱ་བའི་ལས། །མི་ཆེན་མཇལ་དང་ཕྱག་འབུལ་པ། །མེའི་ལས་ཁྱད་པར་དབང་དྲག་ཧོ། །ཐབ་བཅའ་བུ་བཙས་རབ་ཏུ་བྱུང༌། །སྨན་སྦྱོར་ཁྲུས་དང་དྲི་ཡི་ལས། །དངོས་པོ་ཚུར་ལེན་རྟ་ཕྱུགས་འདུལ། །གསེར་ཤིང་རུས་པ་པགས་པའི་བཟོ། །འབྲོག་དགོན་ནགས་ཁྲོད་འགྲོ་བ་དང༌། །གསོན་སྟོན་ཡོ་ལངས་དགེ་ཤིས་སོགས། །གསོན་པོའི་བྱ་བ་སྒྲུབ་པ་བཟང༌། །ཁྱད་པར་ཉིན་མོ་ཟླ་བའི་སྨད། །བྱང་བགྲོད་དུས་དང་སེང་ཁྱིམ་སླེབས། །དར་བའི་དུས་སུ་སྟོབས་ཆེའོ། །ལྷ་ཁང་ཁང་གསར་རྨང་གཞི་འདིང༌། །ཕྱིར་གཏོང་ལམ་ཞུགས་མནའ་སྐྱེལ་དགག །ནད་འདྲི་བག་མ་གོས་དྲ་གྱོན། །མི་ཤི་གཤིན་ཆོས་ཤིད་རོ་འདོན། །སྐྲ་སེན་འདྲེག་དང་སྦྲ་ཕྱར་འཚེམ། །གཏར་སྲེག་སྲི་མནན་བསྡུམས་བྱེད་པ། །རྫིང་ཡུར་ས་ཁ་ཞིང་འདེབས་དང༌། །མེ་ཏོག་ཤིང་འཛུགས་རབ་གནས་སྐྱས། །ཁྱིམ་འཛིན་བང་མཛོད་རྩིག་རྣམས་ངན།། ཚེས། ཚེས་བརྒྱད་དཀྱིལ་འཁོར་སྒྲུབ་མཆོད་དང་། །རབ་གནས་རྒྱལ་བ་ལྷ་རྟེན་བཞེངས། །ཞལ་ལྕེ་དགྲར་རྒོལ་དགྲ༌བྲུབ་རྐུན། །མནའ་སྐྱེལ་སྲི་མནན་ཐབ་བཅའ་བཟང་། །སྐྲ་བཀྲུ་གོས་དྲ་བག་མ་ལེན། །རབ་བྱུང་གཏར་ཁ་འབྲུ་འདེབས་ཁྲུས། །ཕྱུགས་ཉོ་རྫིང་ཡུར་ཁྲོན་འདྲུ་ངན།། སྐར་མ། ས་ག་གྲུབ་སྐར་མེ་ཡི་ཁམས། །བཏང་སྙོམས་ཅན་ཏེ་ཞིང་གི་བླར། །དཀྱིལ་འཁོར་འདྲི་སྒྲུབ་དབང་རབ་བྱུང་། །སྦྱིན་སྲེག་འཆད་ཉན་གཉེན་སྦྱོར་བ། །བག་མ་ལེན་དང་བུ་ལོན་འཇལ། །བཟོ་དང་ཁྱིམ་གསར་བང་མཛོད་འཛིན། །དྲ་གྱོན་སྲི་མནོན་རྟ་ཕྱུགས་འདུལ། །ས་ཁ་ས་བོན་ཞིང་གི་ལས། །ཆུ་རགས་སྐྲ་སེན་འདྲེག་དགྲ་འདུལ། །དྲག་ལས་ཁྱད་པར་དབང་ལས་བཟང་། །ས་ཞིང་ཡུལ་མཁར་ཕྱིར་གཏོང་དང༌། །མཁར་ལས་ཁྱིམ་འབུབས་བང་མཛོད་དབྱེ། །ཤིད་དང་དུར་འདེབས་མགྲོན་འགྲོ་ལམ། །ལྟ་གཡང་ཞུ་གསོལ་ལྷ་རྟེན་བཞེངས། །རྒྱལ་ས་སྨན་སྦྱོར་འབྲུ་འཇལ་སྐྱས། །ཁ་མཆུ་སྐྲ་འཁྲུ་སྟོན་མོ་བསྡུམས། །མོ་རྩིས་མེ་ཏོག་ཤིང་འཛུགས་པ། །ཞི་དང་རྒྱས་པའི་ལས་རྣམས་ངན།། འབྱུང་འཕྲོད། མེ་གཉིས་ནང་འཕྲད་འཕེལ་འགྱུར་སྦྱོར། །འཕེལ་འགྱུར་སྦྱོར་བས་ཟས་གོས་རྙེད། །ཚོང་བྱ་སྦྱིན་གཏོང་ས་བོན་འདེབས། །ནོར་རྒྱུན་མ་སྒྲུབ་ཆུ་སྦྱིན་སྟེར། །ནོར་ལྷ་མཆོད་ཅིང་དངོས་གྲུབ་ཞུ།། སྦྱོར་བ། ཚངས་པ་ལྷ་ཡི་གོ་འཕང་ཐོབ། གནམ་སྒོ། དུར་གྱི་གནམ་སྒོར་དུར་བཏབ་ན། །དུར་སྲི་བཏུད་ཅིང་ཐ་མར་འཕུང་།།