གཟའ། སྤེན་པ་དབུལ་པོ་མ་ནིང་བྲན། །བྱིས་པའི་བླ་གཟའ་དམངས་རིགས་ཏེ། །དྲག་པོ་མདོག་ནག་སའི་ཁམས་ལ། །ཁང་པ་རྩིག་བཟུང་ཞལ་བསྲོ་བ། །ས་ཁ་ལམ་འཕྲང་རྫིང་ཡུར་འཆོས།། ཚེ་གཡང་འགུགས་དང་ནོར་ཕྱུགས་ལེན། །ནོར་སྒྲུབ་སྒྱེད་འཛུགས་རྐུན་ཇག་དམག །ཞིང་ལས་མེ་ཏོག་སྐྱེ་ཤིང་འཛུགས། །ལྕགས་དང་མདའ་མཚོན་ནག་པོའི་ལས། །སྲི་མནན་རྒྱལ་མཚན་བང་མཛོད་འཛིན། །ཡུལ་མཁར་མིང་འདོགས་བུད་མེད་བགྲོད། །ཁྱི་གསོ་ས་བོན་འདེབས་དང་རྩིས། །དབུལ་ཕོངས་བྲན་དང་བྱིས་པ་ཡི། །བསྒྲུབ་བྱའི་ལས་དང་དྲག་ལས་བཟང་། །ནག་ཕྱོགས་དར་དུས་ལྟོ་བགྲོད་མཚན། །དལ་འགྲོས་སྟོབས་ཆེ་ཁྱད་པར་དུ། །ཆུ་བུམ་ཁྱིམ་གནས་བསད་ལས་འགྲུབ། །རབ་བྱུང་རབ་གནས་ཁྲིམས་ལུགས་འཆའ། །འཆད་ཉན་སྨན་སྦྱོར་གོས་དྲ་གྱོན། །རྒྱན་འདོགས་ལྷ་གསོལ་རྒྱལ་ས་འཛིན། །ནོར་ཕྱུགས་ས་ཞིང་ཡུལ་མཁར་རྣམས། །ཕྱིར་གཏོང་སྐྲ་འཁྲུ་སྐྲ་སེན་འདྲེག །གསོན་དགེ་བག་མ་གཤིན་གྱི་ལས། །གཏར་སྲེག་ཕྲུ་སློག་ཟློག་པ་ཚོང་། །ལྷ་ཁང་རྟེན་བཞེངས་བྲན་བརྟེན་བསྡུམས། །རྟ་དྲེལ་སྒ་རྒྱག་སྦྲ་ཕྱར་འཚེམ། །རྒྱལ་པོར་ཕྱག་མཆོད་ཞལ་ཆེ་སྐྱས། །ཞི་དང་རྒྱས་པའི་ལས་རྣམས་ངན།། ཚེས། ཚེས་བདུན་དཀྱིལ་འཁོར་མཁར་ལས་ལམ། །རྫིང་ཡུར་ཁྲོན་འདྲུ་ཁྱིམ་གསར་འཛིན། །ཐབ་བཅའ་གཤིན་དང་རྒྱས་ལས་བཟང་། །སྐྲ་འཁྲུ་རབ་བྱུང༌བྲན་བསྟེན་བག །ཞལ་ལྕེ་གཅོད་དང་ཕྱུགས་ཉོ་སྤང་།། སྐར་མ། ས་རི་གཡང་སྐར་རླུང་གི་ཁམས། །མྱུར་བར་འགྱུར་བ་འབྲུ་གནག་བླར། །རབ་བྱུང་དགེ་ལས་དཀྱིལ་འཁོར་དབང་། །འཆད་ཉན་སྨན་སྦྱོར་ཚེ་གཡང་འགུགས། །ལྷ་སྒྲུབ་གཉེན་སྦྱོར་བག་མ་དང་། །ས་ཁ་ཞིང་ལས་ས་བོན་འདེབས། །ཞལ་གསོ་རྟེན་བཞེང་བཟློག་མནན་བསྡུམས། །རྒྱལ་ས་ཞལ་ཆེ་བང་མཛོད་འཛིན། །དྲ་གྱོན་ཆུ་རྒལ་ལམ་དུ་འཇུག །རྟ་གླང་འདུལ་བཅོས་སྟོན་མོ་ཁྲུས། །ས་ཞིང་ཡུལ་མཁར་ཚུར་ལེན་པ། །སྦྲ་ཁྱིམ་འབུབས་དང་ཁྱིམ་དུ་འཇུག །ཆུ་རགས་གཏར་སྲེག་ལྡུམ་ར་འདེབས། །གསོན་གཤིན་ལས་ཕལ་དྲག་ལས་དང༌། །ཚོང་སོགས་མྱུར་སྒྲུབ་ལས་རྣམས་བཟང་། །ས་ཞིང་ཡུལ་མཁར་ཕྱིར་གཏོང་དང༌། །ཕར་འཇལ་དོན་གཉེར་འབྲུ་བང་འབྱེད། །དུར་འདེབས་རྟ་རྒྱུག་ལྟད་མོ་སྐྱས། །མཁར་རྩིག་རྐུན་ཇག་ལས་རྣམས་ངན།། འབྱུང་འཕྲོད། ས་རླུང་འཕྲད་པ་མི་འཕྲོད་སྦྱོར། །མི་འཕྲོད་སྦྱོར་བས་ཟས་ནོར་འཛད། །རྐུན་ཇག་འཇོམས་འཕྲོག་བྱེད་པ་སོགས། །མྱ་ངན་འོང་བས་དོན་མི་འགྲུབ།། སྦྱོར་བ། དཀར་པོ་འགྲོ་འདུག་བྱེད་པ་བཟང་། གནམ་སྒོ། བག་མའི་གནམ་སྒོར་བག་མ་ཡི། །གཏོང་ལེན་བྱས་ན་ཡུགས་ས་འབབ།།  མེ་ལྷ། མེ་ལྷ་ས་སྟེང་གནས་པར་བརྟེན། །སྲེག་བླུགས་འབུལ་ན་སྒྲུབ་པ་པོར། །དངོས་གྲུབ་རྣམ་གཉིས་ཐོབ་པར་འགྱུར། །