གཟའ། པ་སངས་སྟག་གཟིག་རྒྱལ་བློན་དང་། །བུད་མེད་བླ་གཟའ་བྲམ་ཟེའི་རིགས། །ཞི་བ་ས་ཁམས་སྣ་ཚོགས་མདོག །ཆོས་འཆད་རབ་བྱུང་རབ་གནས་དང་། །དཀྱིལ་འཁོར་སྔགས་སྒྲུབ་ལྷ་རྟེན་བཞེང་།། ལྷ་གསོལ་གཉེན་སྒྲིག་བག་མ་ཚོང༌། །ལམ་ཞུགས་ཁང་རྨང་སྦྲ་ཁྱིམ་འབུབས། །རྒྱལ་སར་འཇུག་སོགས་རྒྱལ་བློན་དང་། །བུད་མེད་ཀྱིས་བསྒྲུབ་བྱ་བའི་ལས། །དྲ་གྱོན་ལྟད་སྟོན་རྫིང་ཡུར་འདྲུ། །གྲོགས་བཙལ་འཁོར་བསྟེན་དྲི་སྨན་སྦྱོར། །གཏར་སྲེག་གཤིན་གྱི་བྱ་བ་སྤྱི།། ཆང་བཙོ་སྟོན་མོ་སྐྲ་འཁྲུ་འདྲེག །ས་ཁ་སོ་ནམ་ས་བོན་གདབ། །རིན་ཆེན་ལྔའི་བཟོ་ཁྱིམ་འཛིན་པ། །མོ་རྩིས་རིག་སློབ་བསྡུམས་ཐབ་བཅའ། །རྟ་རྒྱུག་སྒ་རྒྱག་རྩེད་མོ་གྲོས། །རྒྱན་འདོགས་བུད་མེད་དག་ལ་བགྲོད། །ཆུ་རགས་དཀར་ཕྱོགས་རིམ་གྲོ་སོགས། །ཞི་དང་རྒྱས་པའི་ལས་རྣམས་བཟང་། །དཀར་ཕྱོགས་དར་དུས་ལྷོ་བགྲོད་ཉིན། །དལ་འགྲོས་སྟོབས་ཆེ་ཁྱད་པར་དུ། །གླང་སྲང་ཁྱིམ་དུ་དབང་ལས་འགྲུབ། །འཕོ་སྐྱས་ཤགས་འདེབས་འཁོན་བར་པ། །ནད་ཐེབས་ཇག་རྐུན་དུར་སྦ་སྲེག །བུ་ལོན་འཇལ་དང་དྲག་ལས་ངན།། ཚེས། ཚེས་དྲུག་སྐྲ་འཁྲུ་རྒྱས་ལས་བཟང་། །རབ་བྱུང་ལམ་ཞུགས་ཆོས་ཉན༌བྲན། །བག་མ་མཁར་ལས་ཕྱུགས་ཉོ་ངན།། སྐར་མ། ནག་པ་ཟློས་སྐར་རླུང་གི་ཁམས། །མྱུར་བཟང་གནག་ཕྱུགས་ར་ཡི་བླར། །རྟེན་བཞེངས་དཀྱིལ་འཁོར་འདྲི་སྒྲུབ་དབང་། །རབ་བྱུང་ཆོས་ཉན་ཚེ་གཡང་འགུགས། །མདུན་གྲོས་དྲ་གྱོན་རྒྱན་འདོགས་པ། །སྨན་སྦྱོར་སྐྲ་འཁྲུ་བཟོ་ཡི་རིགས། །ར་དང་གནག་ཕྱུགས་ཚུར་ལེན་པ། །ཞིང་ལས་ས་བོན་ཕྱུགས་འདུལ་རྒྱུག །ཁང་གསར་འཛིན་དང་མདོས་གཏོར་འཕང༌། །གཡོས་བྱ་གསོན་གྱི་དགེ་ལས་དང༌། །དབང་རྒྱས་དྲག་དང་མྱུར་ལས་བཟང་། །ལྷ་གསོལ་རབ་གནས་རྒྱལ་སར་བསྐོ། །དགེ་བཤེས་ཆེ་འདོན་ཞུ་བ་བྱེད། །ར་ཕྱུགས་པར་འཇལ་ལམ་དུ་འཇུག །རྒྱལ་སྲིད་བྱ་བ་བསྙེན་བཀུར་དང་། །དགྲ་འཐབ་ཞལ་ཆེ་བུ་འབོགས་བག །དུར་འདེབས་དུར་ཁ་འབྱེད་ཤིང་སྐྱས། །རྐུན་ཇག་རྫིང་ཡུར་བང་མཛོད་དབྱེ། །ལྟད་མོ་ཆུ་རགས་མིང་འདོགས་པ། །དོན་གཉེར་མོ་རྩིས་ཞི་ལས་ངན།། འབྱུང་འཕྲོད། ས་རླུང་འཕྲད་པ་མི་འཕྲོད་སྦྱོར། །མི་འཕྲོད་སྦྱོར་བས་ཟས་ནོར་འཛད། །རྐུན་ཇག་འཇོམས་འཕྲོག་བྱེད་པ་སོགས། །མྱ་ངན་འོང་བས་དོན་མི་འགྲུབ།། སྦྱོར་བ། དགེ་བ་གསོན་སྟོན་བྱེད་པ་བཟང་། གནམ་སྒོ། མཁར་གྱི་གནམ་སྒོར་མཁར་གྱི་ལས། །བྱས་ན་འཕྲལ་དུ་གྱོད་འབྱུང་ངོ་།།  མེ་ལྷ། མེ་ལྷ་ས་སྟེང་གནས་པར་བརྟེན། །སྲེག་བླུགས་འབུལ་ན་སྒྲུབ་པ་པོར། །དངོས་གྲུབ་རྣམ་གཉིས་ཐོབ་པར་འགྱུར། །