གཟའ། ཟླ་བ་ཀླུ་གཟའ་བུད་མེད་བླ། །རྗེ་རིགས་དཀར་སེར་ཆུ་ཁམས་བཞི། །ལྷ་ཁང་རྨང་འདིང་རྟེན་བཞེངས་བཟོ།། དཀྱིལ་འཁོར་འབྲི་སྒྲུབ་རབ་གནས་བྱ། །བླ་མར་ཕྱག་ཡོན་ཀླུ་སྨན་གསོལ། །ཆར་དབབ་རྫིང་ཡུར་སོགས་ཆུའི་ལས། །གཉེན་བག་རྒྱན་འདོགས་བུད་མེད་ལས། །ཁྱད་པར་རྗེ་རིགས་དང་བཙུན་མོའི། །ལས་སྒྲུབ་སྨན་དཔྱད་བཅུད་ལེན་གཡང༌། །ཆང་བཙོ་ཁྲུས་དང་སྐྲ་སེན་འདྲེག །ཕོ་མོ་བཙས་དང་གོས་འདྲ་བྲན། །མེ་ཏོག་ཤིང་འཛུགས་ས་ཁ་འབྱེད། །ཞིང་འདེབས་ཁྱིམ་འཛིན་ཐབ་བཅའ་བ། །ལྟད་སྟོན་བསྡུམས་བྱ་རྟ་གླང་འདུལ། །དགེ་ཤིས་ཞི་རྒྱས་ལས་རྣམས་བཟང་། །ཁྱད་པར་ཕྱོགས་གཉིས་མཚན་མོ་དང༌། །བྱང་བགྲོད་ཀངྑའི་ཁྱིམ་དུ་སླེབས། །དར་བའི་དུས་སུ་སྟོབས་ཆེར་བརྗོད། །རབ་བྱུང་ཆོས་ཉན་གཡང་ཅན་ནོར། །ཕྱི་གཏོང་ལམ་ཞུགས་གོས་གྱོན་པ། །མཁར་ལས་ཆུ་རགས་རོ་སྲེག་པ། །སྲི་མནན་ཁ་མཆུ་དགྲར་རྒོལ་བ། །དབང་དང་དྲག་པོའི་ལས་རྣམས་ངན།། ཚེས། བཅུ་དགུ་སྐྲ་འཁྲུ་ས་ཁ་འབྱེད། །ལམ་ཞུགས་སྲི་མནན་ཞི་ལས་བཟང་། །རབ་གནས་གཤིན་ལས་རྒྱལ་ས་བག །ལྷ་ཁང་རྟེན་བཞེངས་ཕྱུགས་ཉོ་ངན།། སྐར་མ། མོན་གྲེ་འགྲོན་སྐར་ཆུ་ཡི་ཁམས། །མྱུར་བར་འགྱུར་བ་རྟ་བོང་བླར། །རབ་བྱུང་རབ་གནས་དབང་བསྐུར་བ། །རྒྱལ་སར་འཇུག་སོགས་དཔོན་བསྐོ་དང༌། །ལྷ་གསོལ་གཡང་འགུགས་སྨན་སྦྱོར་ཚོང༌། །རྟེན་བཞེངས་མཁར་ལས་ཁྱིམ་གསར་འཛིན། །རྟ་བོང་བཅོས་བྱེད་ཚུར་ལེན་པ། །གོས་དྲ་གོས་གྱོན་རྒྱན་འདོགས་དང་། །བྲེས་རྩིག་དོན་གཉེར་ཞུ་བ་གསོལ། །སྐྲ་འཁྲུ་གསོན་ལས་ཆོས་སྟོན་འདྲེན། །ལམ་ཞུགས་ཞིང་འདེབས་ས་ཁ་དབྱེ། །དམག་སོགས་དྲག་པོའི་ལས་རྣམས་བཟང༌། །རྟ་བོང་ནོར་རྫས་ཕྱིར་གཏོང་བ། །བཟློག་མནན་ཐབ་བཅའ་སྐྱས་དང་གཉེན། །བག་མ་གཏོང་ལེན་གཤིན་ལས་ངན།། འབྱུང་འཕྲོད། ཆུ་གཉིས་ནང་འཕྲད་བདུད་རྩི་སྦྱོར། །བདུད་རྩི་སྦྱོར་བས་ཚེ་སྟོབས་འཕེལ། །སྨན་སྦྱོར་ཁྲུས་བྱེད་བག་མ་ལེན། །ཚེ་དབང་ཚེ་སྒྲུབ་ཆོ་ག་དང་། །གཉེན་དང་ཚོང་བསྐྱེད་འཕེལ་ལས་བཟང་།། སྦྱོར་བ། སེལ་བར་ལམ་སེལ་བྱེད་པ་བཟང་། གནམ་སྒོ། ཤིད་ཀྱི་གནམ་སྒོར་ཤིད་སྟོན་དག །བྱས་ན་འཕྲལ་དུ་གཤིན་ལས་འབབ།། ཀླུ་ཐེབས། ཀླུ་ཐེབས་དུས་སུ་ཆར་དབབ་པ། །ཀླུ་ཆོག་ཀླུ་གཏོར་གཏོང་བ་དང་། །ཀླུ་ལ་མནན་གཏད་སྐྱེལ་སོགས་བཟང་། །