གཟའ། ཕུར་བུ་བྱང་སེམས་སྐྱེས་པ་བློན། །བརྗེའི་བླ་གཟའ་བྲམ་ཟེའི་རིགས། །ཞི་དྲག་འདྲེས་མ་རླུང་གི་ཁམས། །རབ་བྱུང་སྡོམ་འབོགས་དབང་བསྐུར་བ། །དཀྱིལ་འཁོར་སྔགས་བཟླ་རབ་ཏུ་གནས། །སྦྱིན་སྲེག་སྤྱི་དང་སྒོས་རོ་སྲེག །འཆད་ཉན་རྟེན་བཞེངས་རྒྱལ་སར་འདོན། །སྐྱེས་བློན་ཁྱད་པར་བནྡེ་ཡི། །བྱ་བ་སྒྲུབ་དང་དྲ་གྱོན་བག །ལྷ་ཁང་ཁང་རྨང་འདིང་ཐབ་བཅའ། །མཐུ་གཏད་བཟློག་མནན་རྒྱན་འདོགས་ཚོང༌། །རིན་ཆེན་ལྔའི་ལས་རྟ་གླང་འདུལ། །བྲན་བསྟེན་དོན་གཉེར་ལམ་དུ་ཞུགས། །གསོན་གཤིན་སྟོན་མོ་སྐྲ་འཁྲུ་བ། །གཏར་སྲེག་མོ་རྩིས་ཁྱིམ་གསར་འཛིན། །ཆང་བཙོ་སྦྲ་ཕྱར་འཚེམ་འཕོ་སྐྱས། བ་དན་མེ་ཏོག་སྐྱེ་ཤིང་འཛུགས། །ཞིང་སོགས་ས་བོན་གདབ་པ་དང་། །རྟ་དྲེལ་སྒ་རྒྱག་བསྡུམས་མདུན་གྲོས། །བརྟན་ལས་དགེ་ཤིས་རྒྱས་ལས་བཟང༌། །ཟླ་བའི་ཡར་ངོ་ཉིན་མོ་དང་། །དར་དུས་ལྷོ་བགྲོད་མྱུར་བའི་འགྲོས། །ཉ་དང་གཞུར་སླེབས་སྟོབས་ལྡན་ཞིང་།། ཁྱད་པར་བསྐྲད་ལས་སྟོབས་ཆེར་དྲན། །མོ་སྐྱེས་ནད་བཏབ་ཐོག་འབུབས་པ། །མནའ་སྐྱེལ་ཕྱུགས་གཏོང་བཙོན་དུ་ཚུད། །སྐྲ་སེན་འདྲེག་རྣམས་ངན་པས་སྤང༌།། ཚེས། བཅོ་བརྒྱད་སྐྲ་འཁྲུ་རབ་བྱུང་དང་། །དགེ་ལས་ཐབ་བཅའ་ས་བོན་འདེབས། །རྟེན་བཞེངས་ཆུ་རགས་སྦྱིན་སྲེག་དང་། །སྲི་མནན་དྲག་པོའི་ལས་རྣམས་བཟང་། །སྒོ་འཛུགས་ཐོག་དབུབ་ལམ་ཞུགས་བག །གཤིན་ལས་རྒྱལ་ས་གཏར་སྲེག་དང་། །ཕྱུགས་ཉོ་རྫིང་ཡུར་ཁྲོན་འདྲུ་ངན།། སྐར་མ། ལྷ་མཚམས་ཟློས་སྐར་ས་ཡི་ཁམས། །མྱུར་ལ་བཟང་བ་བརྗེའི་བླར། །རབ་བྱུང་རབ་གནས་ལྷ་གཡང་སྨན། །དགེ་ལས་ཆོས་སྟོན་མཆོད་རྟེན་གསོ། །ཞིང་ལས་སོན་གདབ་ཚེ་སྒྲུབ་པ། །དྲ་གྱོན་རྒྱན་འདོགས་རྒྱལ་སར་བསྐོ། །གཏར་སྲེག་སྐྲ་འཁྲུ་རི་མོ་བཟོ། །ནོར་ལེན་ཁ་མཆུ་ཤེད་སྡུད་པ། །རྩེད་འཇོ་ལམ་ཞུགས་ནོར་ཕྱུགས་ལེན། །དམག་ཇག་ཕར་རྒོལ་གཏད་དྲག་ལས། །རྩོད་བསྡུམས་མཚོན་དང་མྱུར་ལས་བཟང་། །ཁྱིམ་འབུབས་གཤིན་ལས་ཤིད་བག་མ། །ཕྱིར་འཇལ་མདུན་གྲོས་མཁར་ལས་དང་། །ཡུལ་ཁྱིམ་གསར་འཛིན་ས་ཁ་དབྱེ། །སྟོན་མོ་བཟློག་མནན་བུ་འབོགས་པ། །རྟ་བོང་དྲེའུ་འདུལ་བཅོས་བྱེད། །ཐབ་བཅའ་ཞི་བའི་ལས་རྣམས་ངན།། འབྱུང་འཕྲོད། ས་རླུང་འཕྲད་པ་མི་འཕྲོད་སྦྱོར། །མི་འཕྲོད་སྦྱོར་བས་ཟས་ནོར་འཛད། །རྐུན་ཇག་འཇོམས་འཕྲོག་བྱེད་པ་སོགས། །མྱ་ངན་འོང་བས་དོན་མི་འགྲུབ།། སྦྱོར་བ། ཡོངས་འཇོམས་བཙོན་དུ་འཆིང་བར་འགྱུར། གནམ་སྒོ། དུར་གྱི་གནམ་སྒོར་དུར་བཏབ་ན། །དུར་སྲི་བཏུད་ཅིང་ཐ་མར་འཕུང་།།  མེ་ལྷ། མེ་ལྷ་ས་སྟེང་གནས་པར་བརྟེན། །སྲེག་བླུགས་འབུལ་ན་སྒྲུབ་པ་པོར། །དངོས་གྲུབ་རྣམ་གཉིས་ཐོབ་པར་འགྱུར། །