གཟའ། ཕུར་བུ་བྱང་སེམས་སྐྱེས་པ་བློན། །བརྗེའི་བླ་གཟའ་བྲམ་ཟེའི་རིགས། །ཞི་དྲག་འདྲེས་མ་རླུང་གི་ཁམས། །རབ་བྱུང་སྡོམ་འབོགས་དབང་བསྐུར་བ། །དཀྱིལ་འཁོར་སྔགས་བཟླ་རབ་ཏུ་གནས། །སྦྱིན་སྲེག་སྤྱི་དང་སྒོས་རོ་སྲེག །འཆད་ཉན་རྟེན་བཞེངས་རྒྱལ་སར་འདོན། །སྐྱེས་བློན་ཁྱད་པར་བནྡེ་ཡི། །བྱ་བ་སྒྲུབ་དང་དྲ་གྱོན་བག །ལྷ་ཁང་ཁང་རྨང་འདིང་ཐབ་བཅའ། །མཐུ་གཏད་བཟློག་མནན་རྒྱན་འདོགས་ཚོང༌། །རིན་ཆེན་ལྔའི་ལས་རྟ་གླང་འདུལ། །བྲན་བསྟེན་དོན་གཉེར་ལམ་དུ་ཞུགས། །གསོན་གཤིན་སྟོན་མོ་སྐྲ་འཁྲུ་བ། །གཏར་སྲེག་མོ་རྩིས་ཁྱིམ་གསར་འཛིན། །ཆང་བཙོ་སྦྲ་ཕྱར་འཚེམ་འཕོ་སྐྱས། བ་དན་མེ་ཏོག་སྐྱེ་ཤིང་འཛུགས། །ཞིང་སོགས་ས་བོན་གདབ་པ་དང་། །རྟ་དྲེལ་སྒ་རྒྱག་བསྡུམས་མདུན་གྲོས། །བརྟན་ལས་དགེ་ཤིས་རྒྱས་ལས་བཟང༌། །ཟླ་བའི་ཡར་ངོ་ཉིན་མོ་དང་། །དར་དུས་ལྷོ་བགྲོད་མྱུར་བའི་འགྲོས། །ཉ་དང་གཞུར་སླེབས་སྟོབས་ལྡན་ཞིང་།། ཁྱད་པར་བསྐྲད་ལས་སྟོབས་ཆེར་དྲན། །མོ་སྐྱེས་ནད་བཏབ་ཐོག་འབུབས་པ། །མནའ་སྐྱེལ་ཕྱུགས་གཏོང་བཙོན་དུ་ཚུད། །སྐྲ་སེན་འདྲེག་རྣམས་ངན་པས་སྤང༌།། ཚེས། བཅུ་གཅིག་རབ་བྱུང་སྐྲ་འཁྲུ་ཁྲུས། །འབྲུ་འདེབས་རྒྱལ་ས་དཀྱིལ་འཁོར་ལས། །ལྡུམ་ར་འཆུ་དང་སྟོན་མོ་ལམ། །བུ་ལོན་འཇལ་དང་ས་ཁ་འབྱེད། །གཏར་སྲེག་དྲག་པོའི་ལས་རྣམས་བཟང་། །འབྲུ་གདབ༌བྲན་བསྟེན་ཕྱུགས་ཉོ་བ། །རྟ་གླང་འདུལ་བ་རྣམས་ངན་ནོ།། སྐར་མ། གྲེ་ནི་དམེ་སྐར་མེ་ཡི་ཁམས། །བརྟན་པའི་དོན་འགྲུབ་ཇག་པའི་བླར། །རབ་བྱུང་འཆད་ཉན་དཀྱིལ་འཁོར་དབང་། །སྦྱིན་སྲེག་ལྷ་གསོལ་ས་འཛིན་མཁར། །གཉེན་སྦྱོར་གཉེན་འཕྲད་ནོར་ཕྱུགས་ལེན། །ཚེ་གཡང་མདོས་གཏོར་བང་མཛོད་དབྱེ། །ཐུག་འགྱེད་ཚུར་འགུགས་གཞིས་ཚོང་བ། །རྒྱན་སྤྲོད་མོ་རྩིས་གསོན་ལས་དང༌། །འབྲས་ལྡན་ཤིང་གདབ་ཞིང་ལས་ཁྲུས། །ཐབ་བཅའ་ཆུ་རགས་བརྟན་པའི་ལས། །དགེ་ཞིང་ཞི་བའི་ལས་རྣམས་བཟང་། །རབ་གནས་སྟོན་མོ་གཤིན་ལས་ཤིད། །རྟ་ཉོ་དགྲ་འདུལ་ལམ་ཞུགས་བག །གཏར་སྲེག་བོང་བུ་ནོར་ཕྱིར་གཏོང༌། །རྟ་བོང་སྒ་བཅོས་བང་མཛོད་བཅའ། །རྫིང་ཡུར་ས་ཁ་གོས་དྲ་གྱོན། །སྨན་བཅོས་བུ་ལོན་འཇལ་ཕྱུགས་འདུལ། །སྦྲ་ཕྱར་འཚེམ་འབུབས་མིང་འདོགས་དང༌། །རྒྱལ་མཚན་འཕན་འཛུགས་དྲག་ལས་ངན།། འབྱུང་འཕྲོད། མེ་རླུང་འཕྲད་པ་སྟོབས་ལྡན་སྦྱོར། །སྟོབས་ལྡན་སྦྱོར་བས་བཀྲ་ཤིས་བྱེད། །རིམ་གྲོ་ལྷ་གསོལ་ཆོས་སྤྱོད་བྱ། །ཞི་རྒྱས་དབང་གི་ལས་རྣམས་འགྲུབ།། སྦྱོར་བ། ངེས་པ་དགྲ་བོ་གཏན་དུ་འཇོམས། གནམ་སྒོ། མགྲོན་གྱི་གནམ་སྒོར་དོན་གཉེར་དང་། །མགྲོན་བྱས་ཁྱིམ་དེ་གུད་པར་འགྱུར།།  མེ་ལྷ། མེ་ལྷ་ས་སྟེང་གནས་པར་བརྟེན། །སྲེག་བླུགས་འབུལ་ན་སྒྲུབ་པ་པོར། །དངོས་གྲུབ་རྣམ་གཉིས་ཐོབ་པར་འགྱུར། །